Minister Jesus-Leito huntu ku Dusron Developments i Domeinbeheer a duna informashon amplio di kontinuashon di e proyekto di Dusron pa konstrukshon di bibienda den bario di Sapaté. E seshon informativo a tuma lugá dia 27 di ougùstùs.
Durante e proyekto aki, lo konstruí un total di 21 kas i lo tin 3 tipo di bibienda, kada un ku su modelo úniko. E fase aki di e proyekto to dura un total di 1 aña i mei i kasnan ta kore entre Nafl. 100.000 te ku Nafl. 225.000. E kasnan di Nafl. 100.000 lo ta estilo ‘bo kas na bo midi’, kual ta enserá un kas di 1 kamber ku sufisiente espasio ku e persona mes por sigui konstruí i amplia e kas despues. Tambe lo tin kasnan di 2 kamber na balor di Nafl. 185.000, i kasnan di 3 kamber na balor di Nafl. 225.000. Kada kas lo tin un tereno di entre 450m2 ku 550m2, ku e doño ta risibí den forma di erfpacht.
Komo parti di e vishon di Minister Jesus-Leito pa kumpli ku e nesesidat di pueblo di Kòrsou pa bibienda, Gobièrnu a sera un asina yama ‘Public Private Partnership’ (PPP) ku Dusron Development pa konstrukshon di 500 kas total. Den e tipo di proyektonan aki, Gobièrnu ta sòru pa e tereno den forma di erfpacht, i Dusron ta sòru pa e infrastruktura i traha kasnan pagabel pa nos komunidat. Tur persona ku ta riba lista di espera di Domeinbeheer tambe ta bini na remarke pa e kasnan.
Na momentu di aplikashon, por indiká esaki i ta risibí un trato preferensial. Pa mas informashon tokante e proyekto aki, i aplikashon pa kas por tuma kontakto ku Dusron via di e website www.dusronbouwbedrijf.com, tambe por yama na 738-3740.
Esaki ta eprome grupo di kas ku Dusron lo konstrui pa yega na e total di 500 kas den diferente bario. E proyekto aki sigur lo duna un realse na e bario di Sapaté.
Bou di guia di Domeinbeheer, e tim kordinadó di Gobièrnu kual ta konsistí di ekspertonan di Servisio pa Planifikashon Urbano (ROP), Servisio pa Obra Públiko (OW) ta traha na un manera serio i diligente pa éksito di e proyekto aki.
Pueblo por sigui spera mas di e proyektonan aki pa komunidat. Domeinbeheer di e manera aki ta kumpli ku e vishon di Gobièrnu i Minister Zita Leito, pa duna mas oportunidat pa trabou i krea mas bibienda pa habitantenan di Kòrsou.
Banda di proyektonan priva, Minister Jesus-Leito ta traha huntu ku Fundashon Kas Popular (FKP) tambe pa sigui yena nesesidat di tur gremio den nos komunidat.
